2/1/14

'The secret life of Walter Mitty' (2013)


Ametsak alde batera utzi eta bizitzen hasi

Erlazionatutako edukia: 'Reality Bites' (1994)
Hona hemen Walter Mittyren (Ben Stiller) bizitzari buruzko istorio bat, gizon arrunt eta langile bat istorioa. Bere bizitza errutinan oinarritzen dela pentsa dezakegu, gorabehera gutxi ditu, bizitza umila azken finean. Ez ditu abentura zirraragarririk edota ingurukoekin partekatzea merezi duen esperientzia berezirik bizi. Bakartia, barnerakoia eta lotsatia. Zein da beraz bere berezitasun aipagarriena? Esna amets egitea. Ideia batean murgiltzen da maiz, pentsamendu batean galtzen da non edozer gerta daitekeen. Amets horietan, errealitate hobeago bat amesten du, non bera heroia den; eta ez zer kontatzerik ez duen galtzaile bat. Hori da Walter Mitty.


Mittyk ‘Life’ aldizkarian lan egiten du, argazkiak errebelatzen. Aldizkariaren paperezko edizioaren azken alea argitaratuko du, nagusiek aro digitalera jauzia emateko erabakia hartu dutelako. Mittyren ardura aldizkariaren azken alearen azala izango den argazkia errebelatzea izango da. Zein da arazoa? Eskatutako argazkia jasotako materialaren artean ez dagoela.

Cheryl (Kristen Wiig) lankidearen gomendioa jarraituz argazkiaren bila joango da. Modu horretan Mittyk inoiz bizitako abentura bati hasiera emango dio. Errealitatea ala ametsa? Mittyk bere bizitzan inoiz emandako jauzirik garrantzitsuena emango du, eta ikusleak berarekin batera salto egingo du (Mittyren garapenari begira nahiko esanguratsua da ondorengo planoa).

‘The secret life of Walter Mitty’ remake bat dugu. Ben Stillerren bertsioa pelikula dibertigarria da, une gazi-goxoak dituena. Orokorrean istorio polita da. Soinu banda oso ona iruditu zait. Pelikularen abesti nagusia David Bowieren ‘Space Oddity’ dela esan daiteke, une hunkigarrienetako baten protagonista da abestia. Abestiez aparte, soinu bandaren alde instrumentalenak “epikotasuna” gaineratzen dio hainbat eszenei. Mittyk ausarta ala koldarra izango den erabaki beharko du. Aldaketei aurre egin beharko die, eta bizitzan eskaini dion abentura honetan beldurrik gabe parte hartu beharko du.
Ametsak alde batera utzi eta bizitzen hasi. Argazkien negatiboez ahaztu, eta horren ordez, argazkien protagonista bihurtu. Walter Mitty errealitate zati txikiekin lan egiten du, baina errealitate hori bizitzen hasteko momentua heldu da. Horregatik, ‘Life’ (bizitza) aldizkarian lan egitea ez da kasualitatea.
‘The secret life of Walter Mitty’ pelikulan generoen nahasketa interesgarri bat ikusten dugu: komedia, komedia erromantikoa, akzioa, abenturak, une musikalak, eta intriga apur bat. Nahasketak funtzionatu egiten du. Aktore taldea zuzena iruditu zait, zuzendaritza lana egokia eta argazki lana txundigarria. Pelikulan beste zenbait pelikulei egindako keinuak aurki ditzakegu, adibidez: (literalena) ‘The curious case of Benjamin Button’ pelikulari egindakoa, eta zeharka ‘Forrest Gump’ pelikulari egindakoa. Erreferente horietako batzuk protagonistaren “ametsen” parte dira, baina ez al da zinema ametsen fabrika? Walter agian bere ametsa biziko du. ‘The secret life of Walter Mitty’ baikortasunaren alde egiten duen pelikula da, protagonistaren izaera grisean gehiegi sakondu gabe.
Bestetik, pelikularen elementu zalantzagarriena eszenen arteko denboraren tratamendua dela uste dut, protagonistaren arteko bidaien arteko denbora zehazki. Batzuetan ikusten ari garen hori errealitate ala ametsa den galdetu dezakegulako. Gero zenbait elementu eta akzio erraz aurreikus ditzakegu, baina beno. Elementu horiek alde batera utziz, pelikulak irabazi nau. Hasieratik amaierara arte goza daitekeen pelikula da. Istorio polita, eta hunkigarria pare bat momentutan.

No hay comentarios:

Publicar un comentario